Սույն թվականի hունվարի 12-13ը «Դիլիջանի երիտասարդների համագործակցության կենտրոն» հասարակական կազմակերպությունը «ԴԱՏԱ․Տվյալներ թափանցիկ և հաշվետու գործունեության համար» ծրագրի շրջանակներում իրականացրեց «Ծրագրի կառավարման սկզբունքները՝ հանրային մասնակցության խթանման նպատակով» երկօրյա դասընթաց։
Դասընթացի նպատակն էր հզորացնել մասնակիցների դրամաշնորհային ծրագրերի կառավարման կարողությունները հանրային քաղաքականությունների մշակման և ջատագովության ոլորտներում։
Սույն դասընթացը «Երիտասարդները քաղաքականությունների մշակման գործընթացներում» եռօրյա դասընթացի տրամաբանական շարունակությունն է, քանի որ ընտրված դրամաշնորհառու երիտասարդները ի սկզբանե մասնակցել են դասընթացի 2 փուլերին, որոնք իրականցվել են Դիլիջանում և Գորիսում, ՀՀ 6 մարզերի 49 երիտասարդների համար, որի ավարտից հետո մասնակիցների շրջանում հայտարարվել է փոքր դրամաշնորհային ծրագրերի մրցույթ։
Դասընթացի առաջին օրվա ընթացքում երիտասարդները անդրադարձան հետևյալ թեմաներին․
- Ծրագրային կառուցվածքի և բովանդակության քննարկում
- Երիտասարդների դրական զարգացման մոտեցումները ծրագրերի բովանդակությունում
- Ծրագրի կառուցվածք
- Տրամաբանակ աղյուսակի պատրաստում (խմբային աշխատանք)
Երկրորդ օրվա ընթացքում երիտասարդները ներկայացրին իրենց ծրագրերը, այնուհետև ուսումնասիրեցին հետևյալ կետերը․
- Ծրագրային բյուջե
- Ծրագրերի հաղորդակցություն
- Հաշվետվություններ
- Գանտի աղյուսակ
Հայտարարված մրցույթի արդյունքում, ընտրվել է 9 երիտասարդ, որոնց շնորհվել է հնարավորություն իրականացնելու փոքր դրամաշնորհային ծրագրեր իրենց համայնքներում։
Ընտրված դրամաշնորհային ծրագրերին կարող եք ծանոթանալ ստորև․
1․ «Ստեղծենք»
Ծրագիրն իրականացվելու է 2022թ, հունվար ամսին, Տավուշի մարզի, Կողբ համայնքում
Ծրագրի նպատակն է համայնքային խնդրի լուծման միջոցով երիտասարդների և ՏԻՄ–երի միջև ստեղծել կայուն համագործակցություն։ Ծրագրի շրջանակներում նախատեսվում է ստեղծել համագործակցության հարթակ՝ ներկայացնելով համայնքային խնդիրներ՝ նախապես դրանք քննարկելով և հնարավոր լուծումներ ձևակերպելով։
2. «Իրազեկ երիտասարդ հանուն կայուն զարգացման»
Ծրագիրն իրականացվելու է 2022թ․ հունվար-փետրվար ամիսներին, Տավուշի մարզի Հաղարծին համայնքում։
Ծրագրի նպատակն է բարձրացնել Հաղարծին համայնքի երիտասարդների մասնակցությունը ՏԻՄ գործընթացներում՝ կարողությունների զարգացման և ՏԻՄ-ի վերաբերյալ գիտելիքների տրամադրման միջոցով։ Անց են կացվելու դասընթացներ, ֆոկուս խմբային քննարկումներ՝ երիտասարդներին առնչվող խնդիրները պարզելու և ՏԻՄ-երի հետ քննարկմանը դրանք ներկայացնելու համար։
3․ «Ժամանակն է միավորվելու»
Ծրագիրն իրականացվելու է 2022թ․ հունվար–մարտ ամիսներին, Վայոց Ձորի Եղեգիս համայնքում։
Ծրագրի նպատակն է նպաստել Եղեգիս համայնքում բնակչության, մասնավորապես երիտասարդների համագործակցությանը տեղական ինքնակառավարման մարմինների հետ՝ համայնքի 12 բնակավայրերում անցկացնելով համայնքապետարանի պաշտոնական կայքի ուսուցման և ՏԻՄ օրենքի վերաբերյալ դասընթացներ, հանրային քննարկում անցկացնել, պատրաստել թեմատիկ հոլովակ, և տարածել տարբեր պաշտոնական էջերով։
4․ «Տեղեկացված ԻՄ ավագանի»
Ծրագիրն իրականացվելու է 2022թ, հունվար–փետրվար ամիսներին, Սյունիքի մարզի Մեղրի համայնքում։
Ծրագրի նպատակն է բարձրացնել ՏԻՄ-ի տեղեկացվածության և բնակիչների հետ համագործակցության մակարդակը՝ կազմակերպելով հանդիպում ավագանիների, ակտիվ քաղաքացիների, ոլորտային մասնագետների և երիտասարդների մասնակցությամբ։ Երիտասարդների խումբը ըստ կենսապահովման ոլորտների կքննարկի հիմնախնդիրները «World Caffee» գործիքով և հիմնախնդիրներն իրենց լուծումներով կներկայացվեն որոշում կայացնողներին։
5. «Քո իրավունքը»
Ծրագիրը իրականացվելու է 2022թ․ հունվար–փետրվար ամիսներին, Լոռու մարզի Լեռնապատ համայնքում։
Ծրագրի նպատակն է իրազեկել Լեռնապատ համայնքի բնակիչներին տեղական ինքնակառավարման մակարդակում իրենց իրավունքների մասի։ Իրազեկման քարոզարշավների կազմապերպում, հանդիպումներ ՏԻՄ-երի հետ։
6․ «Ինտերակտիվ գրադարան»
Ծրագիրն իրականացվելու է 2022թ․ հունվար–փետրվար ամիսներին, Սյունիքի մարզի Գորիս համայնքում։
Ծրագրի նպատակն է «Հրանտ Բաղդագյուլյանի արվեստանոց» հակասրճարանում ստեղծել ինտերակտիվ գրադարան և համայնքային հանդիպումների միջոցով ապահովել երիտասարդների մասնակցայնությունը Գորիս քաղաքում իրականացվող որոշումների կայացմանը։ Կկազմակերպվեն երեք հանդիպումներ երիտասարդների և մշակութային ու հանրային գործիչների հետ, որոնց արդյունքում կքննարկվեն Գորիսի հիմնախնդիրները և այդ հիմնախնդիրների լուծմանը երիտասարդների մասնակցայնությունն ապահովելու միջոցները, իսկ արդյունքում ակտիվ խմբի կողմից կպատրաստվի և Գորիսի համայնքապետարանին կներկայացվի առաջարկությունների փաթեթ։
7․ «Համայնքագետ»
Ծրագիրն իրականացվելու է 2022թ․ հունվար–փետրվար ամիսներին, Գեղարքունիքի մարզի Սևան համայնքում։
Ծրագրի նպատակն է բարձրացնել Սևան համայնքի 13-17 տարեկան 15 պատանու համայնքային ակտիվությունը։ Նախատեսվում է իրակացնել հնգօրյա դասընթաց և մեկ հանդիպում Սևանի համայնքապետի հետ։ Ծրագրի շարունակականությունն ապահովելու նպատակով նախատեսվում է դասընթացի մասնակից պատանիներին ներգրավել համայնքային տարբեր ծրագրերում և կամավորական աշխատանքներում։
8․ «Երիտասարդական ուժ»
Ծրագիրն իրականացվելու է 2022թ, հունվար-փետրվար ամիսներին, Տավուշի մարզի Նոյեմբերյան/Բերդավան համայնքում։
Ծրագրի նպատակն է երիտասարդների կարողությունների հզորացման միջոցով՝ ապահովվել համայնքի բնակիչների հավասար հնարավորություններն ու մասնակցությունը ՏԻՄ-ին։ Երիտասարդների կարողությունները կհզորացվեն՝ դասընթացների, ֆոկուս խմբային քննարկումների միջոցով, նույն երիտասարդների շնորհիվ կիրականացվեն ուսումնասիրություններ պարզելու համար համայնքի բնակիչների իրազվածությունը ՏԻՄ-ի գործառույթների վերաբերյալ և համայնքի խնդիրների վեր հանման նպատակով։ Կկազմակերպվեն քննարկումներ համայնքի բնակիչների հետ՝ ներկայացնելու ՏԻՄ-ի գործունեությունը։ Ուսումնասիրությունները կիրականացվեն ՏԻՄ-ին, արդյունքները նիստի օրակարգում ավելացնելու և քննարկելու առաջարկով։
9․ «Հիմնախնդիրների բիզնեսապատում»
Ծրագիրն իրականացվելու է 2022թ, հունվար–մարտ ամիսներին, Շիրակի մարզի Արթիկ համայնքում։
Ծրագրի նպատակն է վեր հանել Արթիկ համայնքին միացած համայնքների խնդիրները՝ տվյալ համայնքները ներկայացնող ակտիվ երիտասարդների միջոցով և դրանք վերածել բիզնես գաղափարների։ Նախատեսվում է ծրագրի ավարտին մշակել ռազմավարություն՝ բիզնես գաղափարների իրագործման նպատակով։
Դասընթացի ավարտին բոլոր 9 դրամաշնորհառուները ստացան իրենց դրամաշնորհների վկայականները։
«ԴԱՏԱ. տվյալներ հաշվետու և թափանցիկ գործունեության համար» ծրագիրն իրականացվում է Եվրասիա
համագործակցություն հիմնադրամի, «ՍՈՑԻԵՍ» փորձագիտական կենտրոն հասարակական կազմակերպության, Բուն
TV հիմնադրամի, «Դիլիջանի երիտասարդների համագործակցության կենտրոն» հասարակական կազմակերպության և
«ՍՈՍԵ կանանց հիմնահարցեր» հասարակական կազմակերպության հետ միասին։ Սույն միջոցառումը
իրականացվում է Ամերիկայի ժողովրդի աջակցությամբ` ԱՄՆ Միջազգային զարգացման գործակալության միջոցով։