Շնորհակալություն, Սփենսըր.

Օրերս «Դիլիջանի երիտասարդների համագործակցության կենտրոն» ՀԿ-ում տեղի ունեցավ Ամերիկյան խաղաղության կորպուսի կամավոր Սփենսըր Քրայնի հրաժեշտի միջոցառումը, որն անցավ ջերմ, հուզիչ և շնորհակալությամբ լի մթնոլորտում։

Միջոցառումը համախմբել էր կենտրոնի երիտասարդներին, շահառուներին, գործընկերներին և բոլոր նրանց, ովքեր այս երկու տարիների ընթացքում հասցրել էին ճանաչել, սիրել և գնահատել Սփենսըրին։

Սփենսըրը Դիլիջան էր ժամանել երկու տարի առաջ՝ որպես Ամերիկյան Խաղաղության Կորպուսի կամավոր։ Կարճ ժամանակում նա դարձավ համայնքի երիտասարդական կյանքի ակտիվ մասնակիցներից մեկը՝ իր նախաձեռնողականությամբ, բացությամբ, պատասխանատվությամբ և մարդկանց հետ անկեղծ կապ ստեղծելու կարողությամբ։

Նրա ներկայությունը կենտրոնում միայն կամավորական աշխատանքի մասին չէր․ այն նաև միջմշակութային երկխոսության, փոխադարձ ուսուցման, ընկերության և վստահության կենդանի օրինակ էր։

Այս երկու տարիների ընթացքում Սփենսըրը կազմակերպել և վարել է մի շարք հետաքրքիր, կրթական և երիտասարդների համար գրավիչ ակումբներ ու հանդիպումներ։

Դրանց թվում էին «Բացահայտենք Ամերիկան», «Խոսակցական անգլերեն», «Կիթառի ակումբ», «Ապագա առաջնորդներ», «Արշավների ակումբ» և այլ նախաձեռնություններ։ Յուրաքանչյուր հանդիպում երիտասարդների համար հնարավորություն էր ոչ միայն նոր գիտելիքներ ստանալու, այլև շփվելու, հարցեր տալու, սեփական կարծիքն արտահայտելու, ավելի վստահ դառնալու և նոր հմտություններ զարգացնելու։

Սփենսըրի գործունեության կարևոր կողմերից էր այն, որ նա կարողացավ ստեղծել ոչ ֆորմալ, ազատ և աջակցող միջավայր, որտեղ երիտասարդներն իրենց զգում էին լսված, ընդունված և խրախուսված։

Նրա անցկացրած ակումբները հաճախ վերածվում էին ակտիվ քննարկումների, թիմային աշխատանքի, ստեղծագործական մտքերի և նոր գաղափարների հարթակի։ Շատ երիտասարդների համար Սփենսըրը դարձավ ոչ միայն ուսուցանող կամ ակումբավար, այլև ընկեր, խորհրդատու և ոգեշնչող անձ։

Կամավորությունը համայնքում կարևոր արժեք է, որովհետև այն մարդկանց միավորում է ընդհանուր նպատակի շուրջ և ստեղծում է փոխօգնության, մասնակցության և պատասխանատվության մշակույթ։ Սփենսըրի օրինակը ցույց է տալիս, որ կամավոր լինելը միայն ժամանակ տրամադրելը չէ․ դա պատրաստակամություն է կիսվելու գիտելիքով, լսելու մյուսներին, սովորելու համայնքից և նպաստելու դրական փոփոխություններին։ Նրա գործունեությունը կենդանի օրինակ էր այն բանի, թե ինչպես կարող է մեկ կամավորը ազդեցություն ունենալ երիտասարդների մտածողության, մոտիվացիայի և համայնքային ակտիվության վրա։

«Դիլիջանի երիտասարդների համագործակցության կենտրոն» ՀԿ-ի համար կամավորության խթանումը և երիտասարդների համար նոր հնարավորությունների ստեղծումը մշտապես եղել են կարևոր ուղղություններ։ Կազմակերպությունը շարունակաբար աշխատում է Դիլիջանի և հարակից համայնքների երիտասարդների համար ոչ ֆորմալ կրթական, միջմշակութային, առաջնորդության, մասնակցության և ինքնազարգացման հնարավորություններ ստեղծելու ուղղությամբ։ Տարիների ընթացքում կենտրոնը դարձել է մի վայր, որտեղ երիտասարդները կարող են սովորել, փորձարկել նոր գաղափարներ, հանդիպել տարբեր մշակույթների ներկայացուցիչների, զարգացնել հմտություններ և ակտիվ դեր ունենալ համայնքային կյանքում։

Սփենսըրի երկու տարվա աշխատանքը ևս մեկ անգամ ընդգծեց միջազգային կամավորության և տեղական երիտասարդական աշխատանքի կարևոր կապը։ Նրա միջոցով երիտասարդները հնարավորություն ունեցան ծանոթանալու այլ մշակույթի, բարելավելու անգլերենի հաղորդակցական հմտությունները, զարգացնելու առաջնորդական կարողությունները և ավելի բաց մտածելու իրենց ապագայի ու համայնքի զարգացման մասին։

Հրաժեշտի միջոցառման ընթացքում մասնակիցները շնորհակալություն հայտնեցին Սփենսերին իր նվիրված աշխատանքի, ջերմ վերաբերմունքի, մշտական պատրաստակամության և Դիլիջանի երիտասարդական կյանքում ունեցած կարևոր ներդրման համար։ Հնչեցին հիշողություններ, բարեմաղթանքներ և անկեղծ խոսքեր, որոնք վկայում էին այն ջերմ կապի մասին, որը ձևավորվել էր Սփենսերի և կենտրոնի երիտասարդների միջև։

Իր խոսքում Սփենսերն ընդգծեց, որ Դիլիջանում անցկացրած տարիները և YCCD-ի հետ համագործակցությունը իր համար բացառիկ և կարևոր փորձառություն են եղել.

«Ես անչափ շնորհակալ եմ, որ իմ կամավորական ծառայությունն իրականացրել եմ Դիլիջանում՝ Դիլիջանի երիտասարդների համագործակցության կենտրոնի հետ, և անկեղծորեն չէի կարող պատկերացնել ինձ որևէ այլ վայրում։ Իմ գործընկերներն ու ուսանողները այս փորձառությունը դարձրեցին իսկապես հրաշալի, և ես չափազանց հպարտ եմ այն ամենով, ինչ նրանք կարողացել են իրականացնել այս երկու տարիների ընթացքում, երբ ես ապրել եմ այստեղ։ Հույս ունեմ, որ Դիլիջանում անցկացրած իմ ժամանակը դեռ երկար ժամանակ դրական ազդեցություն կունենա համայնքի վրա՝ իմ հեռանալուց հետո էլ, ինչպես որ Դիլիջանը շարունակելու է ձևավորել ինձ իմ ողջ կյանքի ընթացքում»։

Թեև Սփենսերի կամավորական առաքելությունն ավարտվում է, նրա թողած հետքը դեռ երկար կմնա Դիլիջանում։ Նրա նախաձեռնությունները, ստեղծած հարաբերությունները, անցկացրած հանդիպումներն ու երիտասարդների հետ կիսած անմոռանալի պահերը շարունակելու են ոգեշնչել շատերին։

«Դիլիջանի երիտասարդների համագործակցության կենտրոն» ՀԿ-ն խորին շնորհակալություն է հայտնում Սփենսեր Քրայնին՝ երկու տարիների նվիրված աշխատանքի, ընկերության, մարդկային ջերմության և Դիլիջանի երիտասարդների զարգացման գործում ունեցած արժեքավոր ներդրման համար։

Շնորհակալություն, Սփենսեր։ Դու միշտ կմնաս YCCD ընտանիքի կարևոր մասնիկը։